Fjallvegahlaupaáætlun 2009

Eins og alþjóð veit hleyp ég yfir nokkra fjallvegi á sumri hverju, mér til skemmtunar og yndisauka. Ég geri ráð fyrir að allir hafi beðið í ofvæni eftir því að ég opinberaði áform mín um fjallvegahlaup ársins 2009, en það hefur ekki komist í verk fyrr en nú. Fjallvegahlaupaáætlun ársins lítur sem sagt út eins og hér segir, með fyrirvara um smáar og stórar breytingar:

• Maí:  Svínaskarð (úr Mosfellsbæ í Kjós) (endanleg dagsetning óákveðin)
• Júní:  Tillögur vel þegnar (kannski Vatnsnesfjall)?
• Sunnud.19. júlí:  Vesturgatan (almenningshlaup á Vestfjörðum)
• Þriðjud. 21. júlí:  Þingmannaheiði (milli Skálmarfjarðar og Vatnsfjarðar)
• Fimmtud. 23. júlí:  Miðvörðuheiði (frá Haga á Barðaströnd til Tálknafjarðar)
• Föstud. 24. júlí:  Selárdalsheiði (frá Tálknafirði til Selárdals í Arnarfirði)
• Ágúst:  Tillögur vel þegnar

Eins og sjá má á þessari upptalningu mun sumarið að öllum líkindum verða helgað Vestfjörðum öðrum landshlutum fremur. Gaman væri að fá félagsskap á þessum ferðalögum. Þeir sem slást í för með mér gera það þó á eigin ábyrgð

Allar nánari upplýsingar um fjallvegahlaupaverkefnið mitt er að finna á síðunni www.fjallvegahlaup.is, sem er reyndar afar frumstæð enn sem komið er. Eins og þar kemur fram hef ég lagt 10 fjallvegi að baki og á 40 eftir óhlaupna.

Skóþvengir bundnir á Ólafsfirði við upphaf fyrsta fjallvega-
hlaups síðasta árs. (Ljósm.: Björk)

Athugasemdir

[Finnur Bárðarson, 22.2.2009 kl. 18:20]

Hvernig nennir þú þessu ? En ég takk ofan fyrir þér, vildi óska að ég hefði þennan kraft. Sjálfur er ég svo latur að ég bókstaflega nenni varla að draga andann.:)

[Védís Thoroddsen (IP-tala skráð) 23.2.2009 kl. 15:53]

Sæll Stefán!

Langar til að benda þér á skemmtilega leið úr því þú verður á Vestfjörðum.Þetta er leiðin yfir Fossheiði,það er úr Arnarfirði  yfir á Barðaströnd.Farið er upp frá bænum Fossi í Arnarf,fylgt er gömlum upphlöðnum reiðvegi(gamla póstleiðin)og komið niður hjá bænum Tungumúla á Barðaströnd.

Bestu kveðjur Védís Th.

[Stefán Gíslason, 23.2.2009 kl. 22:23]

Takk fyrir þetta Védís, ég ætla að skoða þennan valkost gaumgæfilega. Já, og takk fyrir síðast, langt um liðið, 14 ár í vor.