Óþörf orð rýra málið

Mér leiðist þegar fólk skýtur inn óþörfum aukaorðum í texta, t.d. óþörfu aukafrumlagi, eða hvað það nú annars heitir það ágæta lag. Oftast er það auðvitað smekksatriði hvort aukaorð séu til þess fallin að auðga textann eða rýra, en í dag rakst ég á setningu á mbl.is sem ég tel vera dæmi um hið síðarnefnda:

Alls voru 24 keppendur frá Íslandi sem tóku þátt í mótinu og hömuðu þeir sex Norðurlandameistaratitlum

Mér hefði fundist setningin betri svona:

Alls tóku 24 keppendur frá Íslandi þátt í mótinu og hömpuðu þeir sex Norðurlandameistaratitlum

Þegar búið er að skrifa texta, er það í senn góð hugmynd og góð æfing að lesa hann yfir með niðurskurðargleraugum og prófa að taka út einstök orð. Ef textinn er jafngóður eða betri eftir, þá hefur orðið mátt missa sín.

Þetta var málfarsnöldur.

Athugasemdir

[Hlédís, 15.4.2009 kl. 15:22]

"Íslenskir keppendur voru 24 og hömpuðu (þeir) sex Norðurlandameistaratitlum"

Kveðja!

[Hlédís, 15.4.2009 kl. 15:27]

Sex orða saga:

"Íslensku keppendurnir 24  hömpuðu sex Norðurlandameistaratitlum"

Frekari niðurskurður kemur niður á upplýsingunum

[Sveinn Ingi Lýðsson, 15.4.2009 kl. 18:19]

Þörf ábending. Góð Hlédís!

[Gunnar Guttormsson (IP-tala skráð) 15.4.2009 kl. 22:19]

Ég fagna mjög svona „málfarsnöldri“ og mætti vera meira af því á bloggsíðum. Dvalarhorfsáráttan (Dæmi: „Ég er ekki að skilja þetta …“ og önnur viðlíka) virðist því miður ekki á undanhaldi; þar étur hver eftir öðrum. Og svo er eins og fólk (og ekki síst stjórnmálamenn) hafi gleymt því að til eru fleiri lýsingarorð en „gríðarlegur“. Þvílíkur smitsjúkdómur!

[Hlédís, 15.4.2009 kl. 22:26]

Gunnar, Sveinn Ingi og Stefán!

Ég er að eiga afskaplega erfitt með að taka sumu í málfars-þróuninni.

[Ólafur Þórðarson, 16.4.2009 kl. 01:24]

Stefán, það er bráðnauðsynlegt að sýna aðhald í afturfarsmálum hins svala tungumáls okkar. Ehemm.

Vonandi geta Moggamenn ráðið þig til að lesa yfir vefgreinar og taka aðeins til í þeim.